Libro do mes de novembro

LIBRO DO MES DE NOVEMBRO 2015

AUTOR: M. Betés de Toro (compilador)

TÍTULO: Fundamentos de musicoterapia

EDITORIAL: Moralta CIDADE: Madrid ANO: 2000 NÚMERO DE PÁXINAS: 399

Este libro é un traballo de colaboración de numerosos autores co propósito de ofrecer unha visión o máis clara e completa posible sobre os aspectos básicos que fundamentan a Musicoterapia, entendida como a disciplina que estuda a música na prevención e tratamento de moitos trastornos. Neste senso, aborda a temática desde un punto de vista utilitario, é dicir, como remedio para curar, paliar ou evitar trastornos, tanto físicos como psíquicos. Trátase dun manual que xurdiu ao abeiro dos cursos de posgrao celebrados na Universidade de Alcalá de Henares, polo que se tratan diferentes cuestións dende unha perspectiva sistemática e científica.

(Se queres recibir esta información no teu correo electrónico, déixanos a túa dirección no buzón de suxestións)

Libro do mes de outubro 2015

LIBRO DO MES DE OUTUBRO 2015

AUTOR: Matthew Rye- Luis Suñén

TÍTULO: 1001 discos de música clásica que hay que escuchar antes de morir

EDITORIAL: Grijalbo ANO: 2008 NÚMERO DE PÁXINAS: 960

TRADUTOR E ADAPTADOR: Luis Suñén

Este libro ofrece unha lista das mellores gravacións de música “clásica” da historia nun só volume, constituíndo unha obra crucial para entender e apreciar a música culta occidental. Nesta escolma aparecen reflectidos traballos desde os madrigais medievais ata algunhas das máis innovadoras composicións de artistas contemporáneos. A través de fichas detalladas, coas reproducións das cubertas dos discos, así como aquelas características máis reseñables de cada gravación, o libro vai facendo un percorrido cronolóxico pola historia da música. Esta discografía seleccionada por un equipo internacional de máis dunha vintena de críticos de música recolle un total de 1001 traballos de gravación de primeira calidade. Trátase dun volume moi interesante para se achegar á música clásica sen medo.

(Se queres recibir esta información no teu correo electrónico, déixanos a túa dirección no buzón de suxestións)

Libro de mes de maio

AUTORA: Carmen Rodríguez Suso

TÍTULO: Prontuario de Musicología. Música, sonido, sociedad.

EDITORIAL: Clivis

ANO: 2002

NÚMERO DE PÁXINAS: 239

Neste libro a autora realiza unha revisión dos principais elementos que interfiren no concepto da musicoloxía e a experiencia da música. Por medio de sete capítulos vai desgranando os pasos a seguir na investigación musical, así como as principais fontes de información (notación musical, fonografía, organoloxía, iconografía musical, literatura musical). Engade tamén un completo compendio de profesións que existen hoxe vinculadas á música, podendo servir de guía práctica para o futuro profesional dos mozos e mozas que estudan no conservatorio. Como a propia autora escribe:

“En el texto se exponen los aspectos más importantes de esta disciplina, explican su relación con la música práctica y sus procedimientos de trabajo, y planteando las reflexiones que ello provoca en los autores recientes. El tono expositivo empleado atiende a criterios divulgativos, pensando en un lector no especializado. De hecho, este libro se dirige a estudiantes tanto como a aficionados a la música, y no hace falta saber música para leerlo y entenderlo.”

(Se queres recibir esta información no teu correo electrónico, déixanos a túa dirección no buzón de suxestións)

Libro do mes de abril 2014

TÍTULO: El anillo del nibelungo de Richard Wagner

AUTOR: P. Graig Russell

EDITORIAL: Planeta de Agostini

ANO: 2003

NÚMERO DE PÁXINAS: 456

 TRADUTOR: Patrick Mason

P. Craig Russell é un dos mellores ilustradores de cómic vivos en todo o mundo, e ista é a súa apaixonada e ambiciosa adatación do épico relato de Richard Wagner, O anel do nibelungo. Trátase dun cómic que recolle unha interesante versión do ciclo operístico homónimo de Wagner. 

O ciclo de Wagner, formado por catro óperas continuas pero diferenciadas, é coñecido por ter adatado un antigo mito xermano a unha versión máis moderna. Á vez que capturaba a maxestade mítica daquelas lendas, a visión de Wagner permitíanos ver a personalidade e as motivacións de cada un dos heroes e deuses, dos vilanos e dos mártires. A estrutura desta famosa saga musical é igualmente poderosa, pois cada movemento (O ouro do Rin, A valkiria, Sigfrido e O crespúsculo dos deuses) forma unha ópera separada e conta cun libreto diferenciado.

(Se queres recibir esta información no teu correo electrónico, déixanos a túa dirección no buzón de suxestións)

LIBRO DO MES DE MARZO 2014

AUTOR: Esteban Buch

TÍTULO: La novena de Beethoven. Historia política del himno europeo

EDITORIAL: Acantilado

ANO: 2001

NÚMERO DE PÁXINAS: 504                      TRADUTOR: Juan Gabriel López Guix

Neste texto Esteban Buch analiza, desde unha perspectiva interdisciplinar e rigososa, as causas do éxito da Novena sinfonía. A novena sinfonía compúxose en 1824, e desde entón foi a obra musical con maior éxito político en Occidente, ata o punto de que a súa Oda á ledicia foi designada himno oficial de Europa. Desde o nacemento dos himnos nacionais na modernidade e desde a construción, ao longo do século pasado, do mito de Beethoven, familias políticas de diversa índole e incluso antagónicas -desde os republicanos franceses aos nacionalistas alemáns- usaron o final da Novena, e hoxe, nunha trama política cada día máis complexa, parece erixirse como símbolo integral europeo dun proxecto compartido que, seguindo a estela do texto de Schiller (“tódolos homes serán irmáns”), apunta cara unha antiga utopía de fraternidade.

O AUTOR

Esteban Buch (Bos Aires, 1963). É profesor da École des Hautes Études en Sciences Sociales en París, onde dirixe o Centro de Investigacións sobre as Artes a Linguaxe. Obtivo a beca Guggenheim en 1999 e o diploma ao mérito da Fundación Konex en 2009. O seu libro La novena de Beethoven recibiu o premio Grand Prix des Muses L'Espress-France Culture en 1999. Outras publicacións súas son: O caso Schönberg, O pintor da Suíza arxentina, Xuremos con gloria morrer, Historia dunha épica de Estado, The Bomarzo affair. Ópera, perversión e ditadura ou Historia dun segredo.

(Se queres recibir esta información no teu correo electrónico, déixanos a túa dirección no buzón de suxestións)

Libro do mes de febreiro: Tchaikovsky y los niños

DATOS DO LIBRO/DISCO

AUTOR: Anna Obiols, Subi, Tchaikovsky

TÍTULO:Tchaikovsky y los niños

EDITORIAL: Bellaterra Música

ANO: 2010

NÚMERO DE PÁXINAS: 24

DATOS DO LIBRO

Trátase dun libro de contos para nenos de entre 6 e 8 anos, que inclúe o conto “Tchaikovsky no pequeno mundo dos xoguetes", un CD co conto gravado e un extracto de 25 pezas para piano do Álbum da xuventude, interpretado por Marina Rodríguez.

De pequeno a Piotr I. Tchaikovsky lle encantaban os contos, xa que tiña unha coidadora que lle contaba moitos. Así ao medrar e ver que ao seu sobriño Bobik de seis anos lle gustaban tamén, igual que tocar o piano, Piotr compúxolle unha serie de pezas para piano. Cada unha facía referencia a unha historia fantástica, a un conto, a un xoguete ou a algunha viaxe. Así cada peza tiña o seu propio título, para que Bobik as puidese imaxinar á vez que as tocaba. A este caderno musical chamoulle “Álbum da xuventude” na honra ao seu admirado Robert Schumann.

(Se queres recibir esta información no teu correo electrónico, déixanos a túa dirección no buzón de suxestións)

Libro do mes de xaneiro de 2014

DATOS DO LIBRO

AUTOR: Nikolaus Harnoncourt

TÍTULO: La música como discurso sonoro. Hacia una nueva comprensión de la música

CIDADE DE EDICIÓN: Barcelona

EDITORIAL: Acantilado

ANO: 2006                                                 TRADUTOR DO ALEMÁN: Juan Luis Milán

NÚMERO DE PÁXINAS: 339

DATOS DO AUTOR

Despois de estudar na Academia de Música de Viena en 1952, foi violonchelista coa Sinfónica de Viena. Un ano máis tarde fundou, xunto coa súa muller a Concentus Musicus Wien, incluíndo instrumentos de época e centrándose na música do Renacemento e o Barroco. En 1972, foi profesor do Mozarteum de Salzburgo, e a súa carreira como director emerxeu rápido ao dirixir lendarios ciclos de obras de Monteverdi e Mozart. Dirixiu orquestras coma a Royal Concertgebouw Orchestra de Ámsterdam, a Orquestra de Cámara de Europa, a Filarmónica de Viena e Berlín. Hoxe Nikolaus Harnoncourt é unha estrela internacional entre os directores de orquestra.

BREVE RESUMO DO LIBRO

Neste libro recóllese unha colección de ensaios deste intérprete e director, que conforman unha interesante contribución ao pensamento musical do noso tempo. Foi publicado orixinariamente en 1984 e constitúe para moitos un auténtico “credo” dunha das voces máis recoñecidas no ámbito da interpretación musical histórica. Esta compilación aglutínase en tres partes diferenciadas que abordan a música desde o punto de vista interpretativo, pero incluíndo moi interesantes reflexións históricas sobre a música e o proceso que a fai posible. A primeira parte titúlase “Aspectos fundamentales de la música y de la interpretación”; a segunda sección “Instrumentario y discurso sonoro”, centrándose nalgúns exemplares de organoloxía do Barroco e do Clasicismo; e a última sección titúlase “Música barroca europea- Mozart”, na que realiza unha viaxe polos diferentes compositores que máis aportaron á música occidental no século XVIII.

(Se queres recibir esta información no teu correo electrónico, déixanos a túa dirección no buzón de suxestións)

Libro do mes de decembro 2013

AUTOR: François- René Tranchefort

TÍTULO: Guía de la música sinfónica

CIDADE DE EDICIÓN: Madrid

EDITORIAL: Alianza Música

ANO: 2003                                        TRADUTOR: Eduardo Rincón

NÚMERO DE PÁXINAS: 1320

Este dicionario está dirixido a un público moi variado, xa que contén unha completa guía sobre a música sinfónica, que convida ao oínte a unha escoita activa e documentada.

O repertorio abrangue unha completa selección de obras que soan a través dos diversos medios de comunicación, procurando abordar xéneros coma sinfonías, concertos, poemas sinfónicos, suites, divertimentos, serenatas, oberturas e mesmo extractos de obras líricas ou ballets. Por iso aglutina preto de cinco mil análises de máis de douscentos compositores.

Unha fonte de consulta imprescindible para os melómanos e estudantes de música, xa que nos ofrece unha completa guía de composicións orquestrais, incluíndo as circunstancias da súa creación, as súas fontes de inspiración, a data e lugar de estrea e a acollida que recibiu, así como a instrumentación precisa e a duración media da execución. Toda unha fonte de información que se pode consultar na sala da nosa biblioteca.

Achégate e busca a túa obra preferida!  

(Se queres recibir esta información no teu correo electrónico, déixanos a túa dirección no buzón de suxestións)

Introducción a la música del siglo XX: libro do mes de novembro 2013

DATOS DO LIBRO

AUTOR: Ottó Károlyi

TÍTULO: Introducción a la música del siglo XX

CIDADE DE EDICIÓN: Madrid

EDITORIAL: Alianza Música

ANO: 2000                                                 TRADUTOR: Pedro Sarmiento

NÚMERO DE PÁXINAS: 373

DATOS DO AUTOR

Ottó Károlyi  é un musicólogo nado en París que realizou estudos en Budapest, Viena e Londes. Actualmente exerce como profesor na universidade de Stirling (Escocia). É coñecido principalmente polos seus libros de divulgación, como Introdución á música, e análise sobre a música contemporánea, como Introdución á música do século XX.

BREVE RESUMO DO LIBRO

 A música do século XX suscita a miúdo, salvo en círculos pechados, un sentimento de rexeitamento. O autor propón neste libro un achegamento ás principais características desta música para poder chegar a un mellor comprendemento e desfrute. Para iso realiza unha análise sistemática dos cambios de estética que se foron producindo ao longo do século, tendo en conta a complexidade que adquiriu o fenómeno musical desde as vangardas de comezos do século das grandes guerras.

Károlyi inicia a introdución do libro do seguinte xeito: “Para a maior parte dos afeccionados á música, a música do século XX é un óso duro de roer. A miúdo se mesturar a confusión e o rexeitamento coa sensación de provocación, ou incluso de burla. Cando a música é complicada, táchase de elitista ou de innecesariamente intelectual. Se a música está baseada nunha idea sinxela, considérase superficial e burda e a reacción máis habitual é a de dicir: “Iso saberíao facer eu”. Poderíase argumentar que a diferenza entre o artista e o home da rúa é que o primeiro fai o que o segundo cre que podería facer, pero non fai (...)”

(Se queres recibir esta información no teu correo electrónico, déixanos a túa dirección no buzón de suxestións)

Beethoven, el músico sordo. Libro do mes de outubro de 2013

DATOS DO LIBRO

AUTOR: Patxi Irurzun

TÍTULO: BEETHOVEN, EL MÚSICO SORDO

EDITORIAL: El Rompecabezas

ANO: 2008

NÚMERO DE PÁXINAS: 125

DATOS DO AUTOR

Pamplona (1969), é autor de libros de contos moi variados, entre os que se atopan “Cuentos de color gris” (1989), Cuentos sanfermineros (2005), e varias novelas coma “Odio enamorado”(2007), “Cuestión de supervivencia” (1998) ou o minilibro “El cangrejo valiente” (2004), entre outras aportacións. Ten colaborado con diferentes medios coma El Canto de la Tripulación, El Europeo, Rolling Stone, Gara, Dominical, Mono Gráfico, Vinalia Trippers, El País…Tamén recibiu diferentes premios coma “El Viajero” de El País-Aguilar, o “Ciudad de Palencia” ou o “Francisco Yndurain” das letras para xoves autores, así como o Premio da Creación Literaria 2004 do Goberno de Navarra.

                                      

BREVE RESUMO DO LIBRO

 

Trátase dun conto con actividades, recomendado a partir de 9 anos, que tomando como fío condutor a Quinta Sinfonía de Beethoven, nos introduce nos sorprendente mundo de Otto, un neno de 10 anos, que se propón reconstruír a súa vida a través das persoas que o coñeceron: un inventor de autómatas, un amor secreto… Toda unha sinfonía de divertidas peripecias.

Libro do mes de maio de 2013

DATOS DO LIBRO

AUTOR: ClemensKühn

TÍTULO: Historia de la composición musical en ejemplos comentados

CIDADE DE EDICIÓN:Barcelona

EDITORIAL: Idea Books

ANO: 2003

NÚMERO DE PÁXINAS: 383

EDICIÓN ORIXINAL: Bärenreiter-VerlagKarlVötterle, 1998

TRADUCIÓN: Francisco Fernández del Pozo

O AUTOR

ClemensKühn  (1945) é un compositor e notable musicólogo alemán, moi coñecido polos seus libros de teoría e análise musical. Naceu en Hamburgo, estudou no conservatorio da súa cidade natal e despois con Diether de la Motte e CarlDahlhaus. Obtivo o doutoramento en 1977 cunha tese sobre as obras orquestrais de BerndAloisZimmermann, publicada en Hamburgo en 1978. Despois de ser asistente, foi nomeado profesor de teoría musical na Escola de Arte de Berlín en 1978, cambiando ao Conservatorio de Múnich en 1988 e ao conservatorio “CarlMariavonWeber” de Dresde en 1997.

Kühndestacou entre 1978 e 1996 como editor e co-editor da revista "Musica" (Bärenreiter-Verlag), ademais de escribir sobre teoría musical para a nova edición de MGG/Sachteil. Éco-editorda revista Musiktheorie (Laaber-Verlag). Os seus puntos de interese musical están entre a análise musical e a teoría musical.

BREVE RESUMO DO LIBRO

Este libro non vai dirixido, como podería facer pensar o título, de forma exclusiva a compositores ou estudantes de composición, senón que o seu radio de acción é moito máis amplo. Os plantexamentos que emprega o autor nesta obra teórica resultan non só orixinais, senón tamén eficaces e clarificadores en moitos aspectos. Os capítulos están dedicados ás transformacións da linguaxe e aos xéneros por épocas, tratadas cronoloxicamente, incluíndo elementos comparativos para extraer conclusións sobre as técnicas compositivas. A realidade amósanos que o proceso de desenvolvemento na composición non ten lugar de forma liñal, senón que as técnicas e os diferentes puntos de vista se suceden na historia da composición alternativamente.

Fontes das imaxes: enclavecreativa.com; ideabooks.com

(Se queres recibir esta información no teu correo electrónico, déixanos a túa dirección no buzón de suxestións ou en biblioteca.conservatoriourense@gmail.com)

Libro do mes de abril de 2013

LIBRO DO MES DE ABRIL DE 2013

DATOS DO LIBRO

AUTOR: Xavier Groba González

TÍTULO: CASTO SAMPEDRO E A MÚSICA DO CANTIGUEIRO GALEGO DE TRADICIÓN ORAL

            Vol. 1. Personaxes e contidos da colección musical

            Vol. 2. Documentario, cartas, escritos musicais e partituras

CIDADE DE EDICIÓN: Redondela (Pontevedra)

EDITORIAL: Concello de Redondela

ANO: 2012

NÚMERO DE PÁXINAS: vol. 1 (558), vol. 2 (725)

DATOS DO AUTOR

Musicólogo e profesor de secundaria, que leu no 2011 na Universidade de Santiago a tese de doutoramento titulada O legado musical de Casto Sampedro Folgar (1848-1937): o canto galego de tradición oral, baixo a dirección do catedrático de música da Facultade de Xeografía e Historia D. Carlos Villanueva Abelairas. O labor investigador de Xavier Groba remóntase a hai máis dunha década, centrándose sobre todo na música de tradición oral e a súa metodoloxía de estudo.

                                      

BREVE RESUMO DOS LIBROS

Trátase dun estudo centrado na análise e edición crítica dos 720 cantos de tradición oral reunidos por Casto Sampedro Folgar, que actualmente están depositados no Museo de Pontevedra. Ademais do documentario recóllense máis de trescentas cartas e todos os escritos musicais atribuídos ao recompilador. O estudo complétase coa contextualización histórica e cultural do proceso de formación da colección Sampedro, que conta ademais con máis dun centenar de colaboradores de entre 1870 e 1924.

 (Se queres recibir esta información no teu correo electrónico, déixanos a túa dirección no buzón de suxestións)

Libro do mes de marzo 2013

DATOS DO LIBRO

AUTOR: Nikolaus Harnoncourt

TÍTULO: EL DIÁLOGO MUSICAL

CIDADE DE EDICIÓN: Barcelona

EDITORIAL:Paidós

ANO: 2003

NÚMERO DE PÁXINAS: 282

DATOS DO AUTOR

Despois de estudar na Academia de Música de Viena en 1952, foi violonchelista con la Sinfónica de Viena. Un ano máis tarde fundou, xunto coa súa muller a Concentus Musicus Wien, incluíndo instrumentos de época e centrándose na música do Renacemento e o Barroco. En 1972, foi profesor do Mozarteum de Salzburgo, e a súa carreira como director emerxeu rápido ao dirixir lendarios ciclos de obras de Monteverdi e Mozart. Dirixiu orquestras coma a Royal Concertgebouw Orchestra de Ámsterdam, a Orquestra de Cámara de Europa, a Filarmónica de Viena e Berlín. Hoxe Nikolaus Harnoncourt é unha estrela internacional entre os directores de orquestra.

                                      

BREVE RESUMO DO LIBRO

Un libro interesante e completo que trata de temas como por exemplo da interpretación barroca, especificamente como interpretar a Monteverdi, Bach ou Mozart. O seu fío argumental céntrase no ofrecemento de consellos a profesionais e ao público en xeral, dicindo “perdamos o medo o vibrato, a vivacidade, a subxectividade, o cálido aire mediterráneo, pero teñámoslle baleiro”. Nikolaus ofrécenos unha análise das paixóns de Bach e Monteverdi, así como unha visión das obras de Mozart, tratando tempos e estructuras e mesmo abordando cuestións organolóxicas.

Proposta e resumo de Fátima Rodríguez Bernárdez (6º GP)

(Se queres recibir esta información no teu correo electrónico, déixanos a túa dirección no buzón de suxestións)